ලේසියෙන් රසට උයන ටිප් එකක්…😋

 ලේසියෙන් රසට උයන ටිප් එකක්…😋

දිව උළුක් වෙන නම් තියෙන වයිවාරන්න කෑම ජාති කප්පරක් අස්සෙ උනත් දුරු මිරිස් තුනපහ පදමට දාපු වෑංජනේක බතක රහ හොයන, ජානවලින්ම ආපු පුරුද්දක් අපේ දිවවල්වලට තියෙනව. 

වෙස්ටර්න් ටයිප් කෑම වේලක් හදන්න මහ වෙලාවක් නොගියට වෑංජන දෙක තුනක් මැල්ලුමක් සම්බෝලයක් එක්ක බතක් උයන එක පුංචි පහේ වැඩක්. කන බත් වේල මට නම් රහට තියෙන්න ඕන. එහෙමයි කියල පැය ගාණක් නැහිල නැහිල කාල වැඩකුත් නෑ. 

ඉතිං මම  මාස කීපෙකට සැරයක් කරි පවුඩර් වර්ග කීපයක් හදල තියාගන්නව. උයන්නෙ නිකම්ම හොදි වෑංජන උනාට මේ කරි පවුඩර්වලට මං නෝමල් කරි පවුඩර්, චිකන් කරි පවුඩර්, බිරියානි මික්ස්, බ්ලැක් ග්‍රේවි වගේ පොෂ් නම් ටිකක් කියනව. නැත්තම් ඉතිං ගෙදර උදවිය උනත් ගණන් ගන්නෑනෙ. 😍

 

වැඩ අධිකකම හින්ද සති කීපයක්ම කඩේන් ගත්ත කරි පවුඩර් අප්පිරියාවෙන් කකා ඉඳල පහුගිය නිදහස් දවසෙ හවස් වරුවෙ පුංචි නිදහසක් හම්බෙලා මෙව්ව ටික ආයෙම හදා ගත්ත.

අද මං කියන බ්ලැක් ග්‍රේවි කරි පවුඩර් එක දාල ඉව්වම කරීස් රහ නැත්තම් ඔයාල මට ඇති තරම් බනින්න.

මේ තියෙන්නෙ මම දැන් පාවිච්චි කරන බ්ලැක් කරි පවුඩර් එක හදාගන්න ගත්ත අඩුවැඩිය ලිස්ට් එක. 

කොත්තමල්ලි කෝප්ප ½ 

කැකුලු හාල් කෝප්ප 2 ½ 

ඩෙසිකේටඩ් කොකනට් කෝප්ප 2 ½ 

සූදුරු කෝප්ප ¼ 

තල කෝප්ප ½

අබ තේ හැදි 08

මහදුරු තේ හැදි 02

උළුහාල් තේ හැදි 02

එනසාල් / කරාබු නැටි 10- 15  බැගින්

කුරුදු අගල් 15,16  කෑල්ලක් 

වසාවාසි මල් 2,3

සාදික්කා කෑල්ලක් ( තේ හැඳි බාගයක් විතර ග්‍රේට් කරගන්න )

බේ ලීෆ් 10,12

ස්ටාර් ඇනීස් මල් 3,4

කරපිංචා ඉති 25, 30

රම්පෙ කොළ 10, 15

1. පොල් රම්පෙ කරපිංචා හැර හැම දෙයක්ම හොඳට හෝදල වේලල තියාගන්න.

2. ගාගත්ත පොල් කෝප්ප 4 කින් වියළි පොල් කෝප්ප 2 -2 ½ ක් විතර හදාගන්න පුළුවන්. මම කරන්නෙ සෙල්සියස් අංශක 50-100 අතර උෂ්ණත්වයක් අඩු වැඩි කරමින් අවන් එකේ වේලා ගැනීම. 

3. රම්පෙ කරපිංච හෝදල වතුර අයින් වෙන ගානට විතරක් වේල ගන්න.

4. දැන් මේ කුළුබඩු වර්ග වෙන වෙනම මද රස්නෙන් බැද ගන්න. 

5. අන්තිමට සියල්ල ග්‍රයින්ඩ් කරල නිවුනම බෝතලයකට අහුර ගන්න.

ටිප්ස් 😋

😋 ඔක්කොම කුළුබඩු එකට දාල බදින්න එපා. සමහර ඒව අඩුවෙන් බැදිල සමහර ඒව පිච්චෙයි.

😋 හැබැයි අතහුරු නම් සමහර කුළුබඩු එකට බදින්න පුළුවන්. උදාහරණයක් විදිහට මම කොත්තමල්ලි ටික යන්තම් බැදෙද්දි රම්පෙත්, තව ටිකකින් කරපිංචත් දානව.

😋 හාල් කප් එකක් අඩු කරල ඒ වෙනුවට කඩල පරිප්පු, මුංඇට, කව්පි දාල බලන්න. ඊලඟ පාර මම ඒව දාන්න ඉන්නෙ.

😋 කළුපාට වෙන්න නෙමෙයි රන්වන් පාට වෙන්න බැද ගන්න. බැදගැනීම තමයි වැදගත්ම. නියම රසය සුවඳ පැහැය එන්නෙ බැදීමෙන්.

😋 පොල් අවන් එකේ වේල ගත්තට ආපහු රන්වන් පාට වෙන්න බදින්න ඕන.

😋 මම මෙෂරින් කප්ස් සහ හැඳිවලින් තමයි මේ ප්‍රමාණ ගත්තෙ.

😋 මීට කලින් පාර හදද්දි මම දාපු අනුපාත මී⁣ට වෙනස්. ඊලඟ පාර මම තව වෙනස් කරනව. 

😋 මම මේ අනුපාත ලියාගෙන ඉන්නෙ අඩු කරන්න ඕන මොනවද ..වැඩි කරන්න ඕන මොනවද .. කියල ආය හදනකොට තීරණය කරන්න ඕන හින්ද මිසක මේවට නියමිත අනුපාතයක් නීතියක් නෑ. තම තමන්ගෙ දිවට හුරු විදිහට ⁣අඩුවැඩිය හොයාගන්න පහසු විදිහට හදාගන්න එකයි තියෙන්නෙ.

😋 මේ කරි පවුඩර් එක සියළුම සී ෆුඩ් වර්ග, මස් වර්ග, පොලොස්, පොලොස් වාගෙ උයන කොහිල අලවලට වගේම කැකිරි ඇඹුලට, වට්ටක්කා නියඹලාව වගේ දේවලට අපූරුයි. 

😋 උකුවට උයන කිරිකොස්, මඤ්ඤොක්කා, දෙල්, අල කිරි හොද්දකට උනත් චුට්ටක් දැම්මම හොඳ රහක් එනව.

වැදගත්ම කාරණාව

❤️ අපි කන බොන මේ හැම කුළුබඩුවකම බෝ නොවෙන රෝග වලක්වාලන, අවම කරන සුව වීමට අනුබල සපයන ප්‍රතිඔක්සිහාරක ගුණය ඉතාමත් බහුලව තියෙනවා. 

ඔයාලත් කැමති නම් හදල රස ද කියන්න. ඔයාලගෙ ටිප්ස්සුත් මට කියන්න.